8. GNU/Linux Ubuntu

     Ubuntu é unha distribución do sistema operativo GNU/Linux a cargo de Canonical Ltd.  Baseada na distribución Debian, é gratuíta e parcialmente ceibe; aínda que libérase baixo as licenzas GNU GPL e GNU LGPL e composta na súa meirande parte de programación ceibe, contén tamén programación propietaria principalmente en forma de controladores de dispositivos.  O mantemento é de 3 anos para as versións de soporte a longo prazo e 18 meses para o resto¹.  Ademais, é posible actualizar a distribución a unha versión superior sen reformatear o disco ríxido.  Ubuntu pode descargarse na páxina web http://www.ubuntu.com/getubuntu/download.

     Ubuntu conta con acceso a redes SMB, e é autenticamente multilingüe: permite a distintos usuarios iniciar sesión con distintas linguas, incluso simultanear sesións en distintas linguas.  Cada usuario pode seleccionar a súa lingua preferida en Sistema –> Administración –> Configuración de idioma, e o cambio non precisa de reiniciar o sistema operativo, senón só reiniciar sesión.

     Pero ademais, Ubuntu conta con dúas avantaxes adicionais sobre Windows NT.  A primeira, que é posible escoller a lingua na pantalla de inicio de sesión, pasando a traballar na lingua escollida dende ese mesmo momento; e a segunda, que no momento en que se cambia a lingua do sistema operativo as aplicacións cambian automaticamente á mesma lingua, salvo unha excepción que se indica máis adiante.

GNU/Linux Ubuntu 9.10 en galego

GNU/Linux Ubuntu 9.10 en español

1 ^LTS – Ubuntu Wiki (https://wiki.ubuntu.com/LTS)

Creado o 29 de xaneiro de 2010

Actualizado o 27 de xullo de 2010