2. Características esenciais

     Son múltiples os sistemas informáticos existentes en galego e español, pero antes de consideralos aptos para un contorno laboral é preciso facer unha selección que satisfaga unha serie de características esenciais. As características seleccionadas neste estudo son, por orde de prioridade:

• Mantemento
• Bilingüismo
• Polivalencia

1. Mantemento

         No século XXI, o mantemento é a base fundamental de calquera sistema informático.  Do mesmo xeito que ninguén compraría un coche que cando pinchara unha roda o houbese que tirar ao lixo, ninguén compraría un sistema informático incapaz de dar resposta os problemas que puidesen xurdir.  O mantemento dos sistemas informáticos consiste en que estes sexan actualizados constantemente.  Soamente así pódese prover de controladores que fagan funcionar a tódolos computadores do parque informático dun centro de traballo, e máis aos computadores que se compren no futuro.  Ademais de garantir o funcionamento da maquinaria, o mantemento tamén é imprescindible por tres razóns -seguridade, estabilidade e rendemento- que por si soas son tan prioritarias como para que non faga falta explicalas.

2. Bilingüismo

        O bilingüismo refírese, obviamente, a que a ferramenta informática estea dispoñible en galego e español.  Pero no ano 2010 xa non abonda con iso; non só se debe poder elixir a lingua da interface, senón tamén cambiala cando se estime oportuno; e cambiala rapidamente e sen necesidade de reinstalar.

3. Polivalencia

        Ademais das características anteriores, o sistema informático ten que incorporar as ferramentas que os traballadores poidan necesitar para desenvolver o seu traballo.  Partindo da experiencia do autor nos contornos laborais galegos, as ferramentas estándares nestes contornos son as seguintes:

   • Acceso a redes SMB con posibilidade de compartir ficheiros e impresoras.
   • Lectura e escritura de disquetes, memorias USB, CDs e DVDs.
   • Paquete de ofimática capaz de editar tódolos documentos usuais (texto, folla de cálculo, etc.) e con capacidade de instalar complementos como por exemplo correctores ortográficos.
   • Navegador con capacidade de instalación de complementos como por exemplo reprodutor de Flash.
   • Xestor de correo electrónico con capacidade de instalar complementos como por exemplo correctores ortográficos.
   • Compresor.
   • Visor de documentos PDF.
   • Creador de documentos PDF.
   • Reprodutor multimedia.
   • Visualizador de imaxes.
   • Contorno de Execución Xava.
   • Antivirus.

Creado o 29 de xaneiro de 2010

Actualizado o 27 de xullo de 2010